Ata që në bisedimet e Vjenës të vitit 2006 e pranuan decentralizimin në baza etnike, që për qëllim e kishte sigurimin e privilegjeve të pakicës e cila përherë ka qen e privilegjuar. Ata që në vitet në vijim e legjitimuan pabarazinë në mes të qytetarëve të Kosovës dhe e heshtën cenimin e sovranitetit të vendit nga Serbia.

Shkruan: Ismajl Kurteshi

Ata që bisedimet me Serbinë i filluan kokë në vete, pa miratim nga Kuvendi; ata që  marrëveshjet ndërkombëtare po i quajnë konkluzioni (për t’i ikur ratifikimit të tyre nga Kuvendi i Kosovës që është obligim kushtetues).

Ata qeveritar që bisedimet për  heqjen e Republikës në takimet ndërkombëtare po i quajnë bisedime teknike. Ata që pranuan të bisedojnë me Serbin para se ajo ta njohë pavarësinë e Republikës së Kosovës. Të njëjtit e hoqën Republikën nga vulat e doganave; kufirin shtetëror e reduktuan në kufi administrativ; pikat kufitare pranuan t’i quajnë pika të kalimit; origjinali i regjistrave civil dhe dokumentet e kadastrave të Republikës së Kosovës pranuan t’i mbeten Serbisë. 

Ata pranuan  që mbi tabelat  RKS të vendosen katër “S” e Serbisë; pranuan që qytetarët e Republikës së Kosovës nëpër Serbi të qarkullohet me dokumente të lëshuara nga Serbia, e kanë humbur tërësisht legjitimitetin,  me e përfaqësuar Kosovën.

Kjo Qeveri e ka humbur legjitimitetin (edhe ashtu të kontestuar për shkak të vjedhjeve të votave në zgjedhjet e 12 dhjetorit të vitit 2010) edhe brenda vendit, sepse përveç abuzimeve në procesin e privatizimit, tenderimit e sfera të tjera, e njëjta e ka imponuar Ligjin diskriminues mbi Trashëgimin Kulturore të Prizrenit dhe Ligjin për Hoqën e Madhe. Kjo Qeveri në vitin 2012  ka bërë presion për anulimin e vendimin të Kuvendit mbi reciprocitetin, ka urdhëruar rrahjen e protestuesve që dolën në mbrojtje të reciprocitetit me 14 dhe 22 janar në Merdare dhe Dheun të bardhë. 

Paralajmërimi se do të heqin dorë nga Republika në takimet e nismave rajonale paraqet kulmin e të këqijave që po na vijnë nga kjo Qeveri, prandaj kjo nuk bënë të kaloj

Të gjitha këto lëshime që po mundohen t’ia shesin popullit si suksese me kinse integrimin në Evropë, përkrahjen e miqve ndërkombëtarë, heqjen e vizave, stabilitetin në rajon, integrimin e komunitetit serb etj. nuk do të kalojnë.

Qytetarët e Kosovës kanë filluar t’i kuptojnë gjërat ashtu si janë, sepse më bindëse janë problemet që po u dalin nga marrëveshjet e arritura në Bruksel se deklaratat e negociatorëve të  Brukselit.

Se marrëveshjet me Serbinë janë të dëmshme për qytetarët e Kosovës po e kuptojnë të gjithë ata që po udhëtojnë nëpër serbi dhe ata që po përpiqen t’i eksportojnë prodhimet e tyre atje. Zëvendësimi i dokumenteve  identifikuese të Republikës së Kosovës dhe tabelat e automjeteve të tyre  me dokumente e tabela të republikës së Serbisë  derisa një gjë e tillë nuk vlen për shtetasit serb që vijnë në Kosovë është vetëm njëra nga dëshmitë e pa barazisë që po e përjeton qytetarët tan po sa po afrohen te kufiri me Serbin. 

Për Republikën e Kosovës është derdhë shumë djers, janë shpenzuar  shumë para, janë bërë shumë sakrifica, shumë fëmijëve i është mohuar e drejta e shkollimit vetëm se i kishin shkruar shkronjat “RK”, prindërve të tyre u mohohej punësimi. Shumë të rinj e kaluan rinin në burgje, shumë nuse e pësuan më rënd se Penelopa, nënat e kaluan pleqërinë në ethe. Për Republikën u kall flakë Kosova, ndodhi eksodi i përcjell me gjenocid. Për Kosovën Republikë ranë dëshmor bijtë dhe bijat më të mira të Kosovës.

Republika ka çmim  tepër të lartë. Ajo nuk është pronë e askujt. Ajo është vlerë e jona sublime. Prandaj nuk ka autoritet dhe as justifikim që guxon ta cenoj Republikën.  Kushdo që jeni ju kontribuues apo armiq të saj mbani duart larg nga Republika, sepse ajo është vlerë sublime pa të cilën jeta nuk ka kuptim për mbi 95% të qytetarëve të këtij vendi. /2lonline/

(autori është kryetar i Qendrës së Lëvizjes Vetëvendosje në Gjilan)